عادل مبروك يكتب يوميات زوج مهروس 6

حلقة 6 مشهد 1
نهار داخلي شقة زكي

الصالة..حسن جالس علي السفرة أمامه كمية أوراق وآلة حاسبة ومستغرق في بعض الحسابات
حسن.. يا خبر ابيض..في اول اسبوعين من رمضان اصرف 3 أضعاف المرتب..امال لو ماكانش شهر توفير وصيام كنت صرفت كام
تدخل سعدية في هدوء وتتابع حسن وهو يكلم نفسه
سعدية.. انت بتكلم نفسك يا حسن ولا دي تخاريف صيام
حسن.. لا يا سعدية ..دي مش تخاريف صيام..دي تخاريف في المصاريف
سعدية.. مصاريف ايه بس..داحنا حتي ماسكين ايدينا ع الاخر
حسن.. ماسكين ايديكم وتصرفوا مرتبي في 3 شهور في اسبوعين اتنين
سعدية.. يا خويا ما كله للبيت والعيال..انت ناسي ان عندك 5 في عين العدو
حسن.. وكمان بتخمسي في وشي
سعدية.. انا اقصد ان كل عيل علي الاقل عايزله الف جنيه دروس ومصاريف ولبس وغيارات وغيره
حسن.. يعني العيال بس عايزين 5000 جنيه..وانا مرتبي بالحوافز وخلافه 1500 جنيه
تدخل حبيبة وتتقدم من والدها.. بابا
حسن.. ايوة يا حبيبة
حبيبة.. الميس في المدرسة عاوزة 300 جنيه عشان هايعملوا حفلة
حسن.. حفلة بمناسبة ايه
حبيبة.. حفلة مولد النبي
سعدية.. عليه الصلاة والسلام
حسن.. قولي للميس بابا جايلك المدرسة بكرة
سعدية.. وتروح للميس ليه..ايه اللي بينك وبينها
حسن.. ياسعدية يافقرية يا نكدية بتقولك حفلة مولد النبي
سعدية.. وماله..دي مرة في السنة
حسن.. وهو منذ بدء الخليقة.. سمعتي ان مولد النبي جه في رمضان
سعدية.. وايه يعني..ماهو 6 اكتوبر جه في رمضان
حسن.. صبرني يا رب
جرس الباب يرن..تذهب حبيبة لفتح الباب..يدخل ربيع وزوجته وابنه وابنته
ربيع.. ازيك يا حبيبة..
حبيبة.. ازيك يا عمو
ربيع.. بابا هنا
حبيبة.. اه..اتفضل
حسن مسرعا ربيع اخويا حبيبي..عاش من شافك
ربيع.. تعيش يا حسن يا خويا
حسن.. للاولاد ازيك يا حسنية ازيك يا سيد
سعدية وزوجة ربيع بالاحضان.. ازيك يا ختي...عاملة ايه
حسن.. ده ايه الخطوة العزيزة دي
ربيع ..والله يا حسن يا خويا..احنا كنا نازلين نشتري لبس العيد للاولاد وفوزية صممت نعدي عليك..اقولها طب خليها بعد الفطار..تقولي لا خلي المشوار بالمرة
سعدية.. يا الف مرحب..ده انتم ليكم وحشة
فوزية.. تعيشي يا سعدية..ماقولتيش..جبتي لبس العيد للاولاد ولا لسة
سعدية.. لسة مستنيين لما حسن يقبض
ربيع.. دي الاسعار السنة دي مولعة
حسن.. السنة دي بس..دي كل سنة
سعدية للاولاد.. بابا جاب لكم فوانيس السنة دي
سيد.. فوانيس ايه يا طنط هواحنا عيال صغيرين.دانا في اعدادية
حسنية.. احنا اتفقنا مع بابا انه يدفع تمن الفوانيس للغلابة واللي محتاجين
حسن.. والله يا بنتي ما جالي حاجة
ربيع.. حسنية بنتي طالعالك يا حسن..عشان كدة سميتها علي اسمك..امال فين الاولاد عشان نسلم عليهم
سعدية.. بيذاكروا في اوضهم..اندهي عليهم يا حبيبة
حبيبة.. حاضر يا ماما
فوزية تهمس في اذن ربيع بالحاح وربيع يرد بقرف.. حاضر حاضر..خلاص بقي فهمت
حسن.. يا مرحب
ربيع.. تصور يا حسن انهم مطلعين اشاعة ان مولد النبي الاسبوع الجاي
حسن.. وانت رايك ايه
ربيع.. فوزية مصممة نجيب حلاوة المولد وكحك العيد مع بعض
سعدية.. وماله يابوسيد..دي مرة في السنة
فوزية.. قوليله يا سعدية ياختي..اقوله كدة يقولي هي حاجة من الاتنين يا حلاوة المولد يا الكحك والبسكويت
حسن يتابع بتعجب
حسن لربيع.. انت مقتنع بالكلام ده يا ربيع.. طب اعمل ايه بس يا حسن..الحكومة عايزة كدة
ربيع يشير لفوزية
حسن يشير لفوزية
الحكومة اقنعتك ان مولد النبي في رمضان
ربيع.. امال ايه
حسن.. يا راجل ده انت اسمك ربيع..علي اسم الشهر اللي اتولد فيه النبي
ربيع.. بجد
فوزية..يعني المولد اتاجل للربيع
حسن.. ياستي ماتاجلش للربيع..هو دايما بييجي في شهر ربيع الاول يوم 12
فوزية.. يعني ما فيش حلاوة مولد الشهر ده
ربيع.. الحمدلله..نفدت..تشكر يا حسن يا خويا..دانا كنت هاتجنن من المصاريف
سعدية تفكر بخبث.. طب عن اذنكم هاروح اشوف العيال ما جوش ليه وبالمرة اجهز الفطار عشان المغرب قرب
فوزية.. وماله يا ختي..تحبي اجي اساعد معاكي
سعدية.. لا يا ختي خليكي مستريحة
سعدية تتجه نحو غرفة الاولاد
ربيع.. ماتتصورش يا حسن انا كنت عاتل هم طلبات العيد والمولد ازاي
فوزية لربيع.. ماتنساش واحنا بنجيب لبس الاولاد تجيبلي عبايتين وفستان وطقمين للبيت
ربيع.. مش ناسية حاجة تاني
فوزية.. لما ننزل ابقي افتكر باقي الطلبات
ربيع.. صبرني يا رب
حسن.. كلنا في الهوا سوا
سعدية تخرج من غرفة الاولاد وتقف معهم وتشير الي ربيع وفوزية كانها تدبر لهم مكيدة..الاولاد يجرون الي عمهم ربيع.. عمو ربيع جه جه..هييه..ههييه
ربيع.. اهلا ولاد اخويا حبايبي
الاولاد ممسكين بعمهم.. هات العيدية يا عمو..فين العيدية
ربيع وفوزيه في حالة زهول..سعدية تضحك بخبث من بعيد..حسن يتعجب
نهاية الحلقة